Sa ti fason ki Madanm Marie-Louise Potter, dirizan zafer gouvernman dan Lasanble Nasyonal, ki osi manm Komite Santral Parti Lepep Anse Etoile, ti dekrir sa gran nonm zenn sa distrik ki ti’n reponn a lenvitasyon pour en rankont Sanmdi pase dan Sant Kominoter Anse Etoile.
Sa rankont ki ti’n ganny organize pour tou zenn aze 18 a 23 an ti ganny anime par de konsiltan Seselwaz ki ti adres size “ Youth Empowerment” e “Bridging the generation Gap”, de size ki ti vreman enteres sa group zenn. Sa de prezantasyon ti donn bann zenn nouvo konesans e zouti pour analiz pli byen sa ki pe pase otour zot e konpran pli byen staz devlopman ki zot pe pas ladan.
Kan i ti pran laparol, Madanm Potter ti dir ki i ti’n envit tou zenn sa laz malgre zot diferan krwayans politik, relizye ou ot, akoz pour li tou zenn Anse Etoile i enportan e kapab fer en diferans dan zot distrik e zot pei. I ti dekrir sak zenn koman en zetwal ki annan menm lenportans parmi tou lezot zetwal dan lesyel. “Every star is important to the sky e fodre pa zot les personn fer zot krwar otreman”, i ti dir.
Madanm Potter ti dekrir Anse Etoile koman en distrik ki annan en labondans potansyel e loportinite pour atrape, e demann bann zenn pour reziste tou tantasyon divizyon, mansonz e kalomni ki serten politisyen i esey propaze dan bann morso papye ki zot partaze dan kominote.
Sa sirpriz ki tou zenn ti pe espere pour war ti finalman mont lo lasenn e egey lafoul avek sa talan ekstraordiner ki i anan pour fer riye ziska ou vant i fermal. Sa ti pa lot ki Verna ki ti’n retourn ankor Anse Etoile pour partaz en moman detant, safwasi avek bann zenn parey li.
Verna ti rakont son leksperyans kan i ti al vote pour premye fwa ansanm avek son msye Zonas ki son kateter ti pe sorti telman i ti pe get bann pti ‘top up’ dan lalinny vote. Ti tro bon e pa bezwen dir ou manrmay ti toufe riye.
En zenn fiy ti dir nou zournalis ki malgre i ti’n ganny dir ki sa ti pou en aktivite zis politik, in tre enpresyonnen avek sa ki in tande e trouve e in demande ki bann rankont parey i devret ganny fer pli souvan. Madanm Potter in remersye tou zenn ki ti prezan e bann ki ti donn leskiz akoz zot pa ti kapab vini, tou bann ki’n travay ansanm avek li pour fer sa rankont en gran sikse.
Source: The People
No comments:
Post a Comment