Bann manm Parti Lepep in swazi Prezidan James Michel avek imanimite koman kandida prezidansyel pour eleksyon me 2011. Zot in fer sa swa ozordi kot 25yem kongre Parti Lepep, kot Sant Konferans Enternasyonal. Prezidan Michel in nom Sekreter Zeneral Parti Lepep, Danny Faure koman son kandida vis-prezidansyel. Prezidan Michel in remersye bann delege sa kongre pour sa konfyans ki zot in konfye li pour sa latas ek sa responsabilite.
« O-fon mon mon leker, mon dir zot mersi. Mersi pour zot konfyans. Mersi pour sa nouvo loportinite ki zot i’n donn mwan pou servi nou pei ek nou pep. Sesel, nou sel patri, i merit sa ki meyer. Nou patri i merit laviktwar toulezour. E mwan, mon pou asire, avek zot sipor – avek sipor tou Seselwa – ki nou pou avans lwen, tre lwen dan semen progre. Napa okenn baryer, okenn defi ki nou pa kapab sirmonte ler nou ini koman en pep, » Prezidan Michel in dir.
Prezidan in koz lo lenportans linite nasyonal, larmomi, stabilite, valer moral e spirityel, lord ek lape koman bann fonnman sosyete Seselwa.In dir ki sa bann prensip i fondamantal pour Parti Lepep.
Prezidan Michel in anonse ki « En Nouve Sesel » i slogan Parti Lepep pour sa eleksyon.
« Sa nouvo Sesel, se mon vizyon progre ek prosperite pour Sesel. Kot personn pa ganny les deryer. Kot tou dimoun i asim son responsabilite endividyel e kolektif. Kot nou sezi tou loportinte devan nou. Kot nou devlop nou lespri antreprenarya. Kot nou devlop nou savwar-fer. E kot Seselwa i reste en pep ini e beni, konsyan son responsabilite, son valer spirityel, moral e kiltirel. »
Prezidan ti remarke ki sel parti ki’n anmenn sanzman Sesel se Parti Lepep e ki i pou anmenn ankor plis sanzman pour byennet tou Seselwa.
« Mwan, mon pa pres sanzman. Mon fer sanzman kot i neseser, e mon fer li dan lentere lepep. Mon fer li an tenan kont levolisyon nou sosyete e levolisyon sitiasyon lo lasenn global. Mon fer li akoz mon annan en vizyon kler pour Sesel, en vizyon ki Seselwa i partaz avek mwan ek mon lekip. »
Manifesto Prezidan Michel pour eleksyon 2011 ti adopte pandan kongre Parti Lepep.
No comments:
Post a Comment