LENSTITISYON POU LADEMOKRASI

 

En foronm ti fer an Avril pour bann lenstitisyon pli for dan lasosyete pour promouvwar bon gouvernans. La ki eleksyon Presidansyel i anba lipye nou pe vwar vreman ki sa ki determin en lanvironnman politik serye ki siport bon gouvernans.
O fil dezane, Sesel in fer bokou progre pour kree bann lenstitisyon for e promouvwar lademokrasi. Gouvernman pe touzour fer plis zefor pour ranforsi son langazman e ofer mwayen tou Seselwa pour desarz zot lobligasyon, egzers zot drwa ek responsabilite e osi partisip dan konstriksyon nou nasyon.
I annan en lenterdepandans ant bon gouvernans e lademokrasi, oubyen, dan en sans pli elarzi, ant lademokrasi, bon gouvernans ek developman. Larealite dizour i fer li neseser pour nou bann lenstitisyon revwar zot rol, razeni zot lekor, ranforsi zot fonksyon ek zot bann valer fondamantal e adopte bann nouvo prensip.
Malgre ki lademokrasi ek devlopman i bann bi dan zot menm, i annan en relasyon ant le de akoz zot mityelman ranforsi kanmarad. Tou le de zot aport benefis pour lepep. Prosperite i kree en lanvironnman stab ki promouvwar lademokrasi, e bann lenstitisyon for i meyer pour amelyor lademokrasi. Lademokrasi inevitableman i bezwen enkli gouvernans dapre lalwa, latransparans e rann kont, desantralizasyon, devlopman medya ek sosyete sivil endepandan, e lasirans ki i annan en vre konpetisyon elektoral.
Fodre dir ki bann parti politik ki for ki pilye lademokrasi.
Se eleksyon kredib ki fer tousala arive. I reflekte swa e pwennvi popilasyon e i asire ki sa bann pwennvi i ganny respekte par sa bann dimoun ki’n ganny elekte ou apwente pour reprezant zot dan lasanble ou dan gouvernman. E la nou dan en peryod eleksyon kot nou pe vwar konpetisyon.
Me nou osi pe vwar defayans kot bann parti politik i konsernen. Bann Parti Lopozisyon pa pe montre ki zot for. Sa bann lensidan sote lo bato pe afekte kredibilte sa bann Parti lavey eleksyon.
Napa pli gran lendikasyon ki tou pa mars byen ler ou bann zofisye ek manm ki’n lwayal pandan plizyer lannen i kite a sa moman. Bann Parti Lopozisyon pa kapab konplent ki zot marzinalize oubyen napa menm lavantaz ki Parti Lepep. Problenm se ki zot pa efikas koman Parti e zot pa pe reprezant laspirasyon zot bann siporter.
I bann Parti ki napa lanbisyon ganny elekte pou diriz pei. Si Lider Lopozisyon i dir ki i kontan i pa ganny eleksyon e ki lamans pwalon i so, eski i pe donn konfyans dimoun dan son kapasite koman en prezidan? I’n toultan dir ki Sesel i bezwen en lopozisyon ki for. Malerezman Seselwa pa pe vwar sa arive dan le fitir imedyat.