‘Nou Sesel i bezwen lanmour tou son travayer’
Prezidan James Michel in demann nou tou pour mazinen kwa ki nou kapab fer anplis pour nou pti Sesel reste sa landrwa kot i bon viv e travay.
“Le 1 Me 2011 nou pe selebre nou Lafet Travayer dan lannen kot nou pe kriy plis viktwar e rod lekselans pour Sesel, dan tou domenn.
« Lazournen Travayer i en rekonesans pour travay dir dan konstriksyon nou pei. Letan nou ti komans pran konsyans nou vre potansyel koman en pep, nou ti pe mazin lavenir nou travayer ek nou zanfan. Zenerasyon avan nou, ek bann ki ankor parmi nou, in fer bokou sakrifis e anmenn gran lalit pour nou ganny sa meyer kondisyon lavi ki nou tou nou pe zouir ozordi.
I ti nou premye gran viktwar lo semen pour batir, par nou prop lafors, en sosyete pli avanse. « Annou pa zanmen oubliye ki sa sistenm sekirite sosyal ki anplas, nou 2 sistenm pansyon, lasante gratwit, plis konze maternite, saler minimonm, plis lannen ledikasyon, plis progranm formasyon, ek lezot benefis, i rezilta en mouvman ki rekonnet e donn plis valer lafors travayer. I bann reisit, ek viktwar, pour travayer ek zot zanfan, ki nou bezwen prezerve a tou pri.
« Ozordi nou rann omaz tou zenerasyon travayer, zonm koman fanm, pour zot rol pour asir lafors, prosperite ek byennet nou tou. Nou dir zot mersi.
« Nou bezwen servi lokazyon le 1 Me osi pour reflesir lo bann defi devan nou. Mon gouverman ti lans en reform makro-ekonomik ki ti neseser pour fasilit devlopman. Nou lo bon semen e nou lekonomi pe fonksyonn byen. Nou to lenflasyon pe byen ganny zere. Kominote biznes lokal ek enternasyonal pe montre plis lentere dan envestir dan Sesel. Plis dimoun i dan lanplwa, sorti 37,625 an 2006 pour mont 43,609 an zen 2010. Saler moyenn i sorti 3,938 roupi an 2006 pour vin 6,247 an 2010. Nou’n reisi entrodwir saler minimonm ki’n ganny ogmante pandan sa dernyen 3-an.
« Anba nou tenm nasyonal pour 2011, Viktwar pour Sesel, nou pe rod lekselans. Mon gouvernman pou kontinyen met bann mekanizm pour annan plis devlopman ekonomik ki a kree plis lanplwa dan Sesel. Dan nou pei ozordi i annan lanplwa pour tou dimoun ki oule travay. Me en keksoz ki ankor trakasan se ki i ankor annan dimoun ki pa oule travay, ki pas zot letan abiz drog ek lalkol. Travay i anmenn dignite.
« Lalwa lanplwa pe ganny revize pour ki i annan en marse lanplwa ki pli fleksib, en lalwa lanplwa pli modern. Nou bezwen etabli en lanvironnman ki permet plis dyalog ant travayer e anplwayer, en lanvironnman ki promouvwar plis prodiktivite ek en lanvironnman ki garanti lape ek prosperite dan landrwa travay e dan Sesel an zeneral.
« Nou bezwen kontinyelman armoniz nou sistenm ledikasyon ek developman resours imen pour reponn bezwen marse lanplwa. Nou’n arive ozordi gany nou prop liniversite pour plis travayer kalifye. Mon profite pour demann tou anplwayer pour kontinyen envestir dan travayer Seselwa. A lonterm sa a permet ki plis Seselwa a kapab gradyelman pran bann pozisyon kle ki pe okipe par travayer etranze.
« Dan sa lannen viktwar kot nou osi pe rod lekselans, fodre nou kontinyelman elev performans nou lafors travay. Nou dan lepok globalizasyon, kot konpetisyon i for, kot nou lafors travayer i bezwen pli byen kadre pour okenn defi.
I pour sa rezon ki mon touzour met laksan lo ledikasyon, formasyon kontinyel, teknolozi enformatik, lespri antreprener ek prodiktivite. Nou Sesel pe deza fer tre byen dan serten domenn, e nou oule partaz sa avek lemonn avek bi prodwir plis larises.
« Nou napa bokou resours natirel, me nou annan nou lentelizans, determinasyon, lafors ek linite nou travayer. Nou bezwen touzour pe re-envestir dan nou pep, pour nou kapab adapte avek sanzman rapid dan lemonn, e vin en lafors travay dinamik pour realiz sa ta devlopman ki dan nou vizyon. Dan Sesel ozordi en kantite laport pe ouver sak nouvo zour.
Viktwar, ekselans, i osi vedir en lafors travayer ki vwar defi koman en motivasyon pour fer pli byen. Ekselans pour nou travayer i azout lo nou leksperyans.
« Nou swe se ki tou etidyan e tou travayer Seselwa i:
• Pran zot letid ek formasyon o serye
• Adopte en latitid pozitiv e responsab
• Mazinen ki an retour nou benefisye avek plis prodiktivite
• Kontan nou pei plis
• Senm mesaz linite ek lanmour
• Pran konsyans ki selman atraver en bon travay ki nou progrese
• Siport nou fanmiy ek nou zanfan
• Sezi bann loportinite lenvestisman e aste par dan bann konpannyen
• Touzour viz ver lekselans dan sa ki nou fer pour kapab sirmont konpetisyon
• Vwar valer nenport ki travay, tou travay, si nou fer li byen
« Ler nou al lanmes le 1 Me, dan nou lapriyer, e pandan moman lwazir sa zour, nou profite pour fer enpe refleksyon lo nou plas dan lasosyete. Nou Sesel ki nou seri bokou i bezwen lanmour tou son travayer. Annou mazinen kwa ki nou kapab fer anplis pour nou pti Sesel reste sa landrwa kot i bon viv e travay.
« Nou fyer nou lafors travayer. Mon fanmiy i zwenn mwan pour swet zot bonn fet. Ki Bondye i touzour beni zot, pour anmenn nouvo Vitktwar e plis Lekselan
No comments:
Post a Comment