Pour tou sa bann gran kozer, bann ki donn lanmen boykot tou keksoz dan sa pei, vwala ki Prezidan Michel atraver son lanmitye ek Prezidan Leta Arab Ini in reisi donn Sesel - en Sant Dyagnostik sofistike ki fer kanmi bann pei vwazen dan Losean Endyen, e pe ganny konsidere koman en sant pli sofistike dan Larezyon. Tou Seselwa pou benefisye san pran kont son kouler politik. Prezidan Michel in promet pour travay pour tou Seselwa e atraver bann sikse parey i pe montre son pep ki i en dimoun parol. Lopital Sesel in ariv lo menm standar an term servis ek modernite avek lopital dan Lerop e bann pei ris dan Lazi, e Mwayenn Oriyan. Sa Sant Dyagnostik in kout en kantite larzan, kote Sesel ti pou ganny resours pour batir en tel fasilite litousel?
Si pa Prezidan Michel lekel sa dirizan ki pou swete fer en tel sikse pour son pep? Definitivman pa en Prezidan SNP. Sa Parti ki depi komansman in kont lanmitye Prezidan sa Leta ris dan Mwayenn Oriyan ek Sesel. Zot pa ti oule ki sa Sheikh i batir son rezidans dan nou pei. Zot ti mont en kanpanny pour esey pous sa Sheikh Sesel e sali son limaz e repitasyon Prezidan Michel aletranze.
Zot in esey servi zabitan La Misere e kasyet par deryer lefe ki ASCON in polye delo sa bann rezidan pour vir pep Seselwa kont sa Sheikh. San laont, san pider e san imilite bann dirizan e zofisye SNP pe malgre sa benefisye lo tou sa kado ki Sheikh Khalifa i donn Sesel.
Lekipman e servis ki sa Sant Dyagnostik pe ofer pasyan Seselwa pou ed gouvernman Sesel depans mwens pour anvoy pasyan trete aletranze. Sa fasilite set en labote pour nou zil. I donn Sesel en lafyerte e prouve ki dan sa 21enm syek Sesel pe fer zis sikse. Envite kot louvertir sa sant in sirprann par sa kado. Sesel pe ganny frekante par zanmi ki fer li dibyen. Prezidan Leta Arab Ini in prouv ek pep Seselwa ki son lanmitye i senser. I pe depans avek Seselwa plis ki in peye pour sa morso later La Misere.
Parmi tou sa lezot pei o monn, in swazir lo nou zil pour envestir. I pa’n zis batir en rezidans parmi sa plizyer ki i annan dan lemonn. I’n war ki Sesel ek Seselwa i vo son larzan.
I tris ki lopozisyon ziska ozordi ankor pe boykot li. Si par mal sans en Prezidan Lopozisyon ti pou vin opouvwar, ki zot pou fer avek sa bann kado ki sa Leta Arab in donn Sesel? Ki zot pou fer avek sa sant e tou sa lekipman pli sofistike ki zanmen Sesel in deza annan e ki’n kout sa Leta de plis ki 10 milyon dolar?
Tou Seselwa i en pasyan enkli Lider Lopozisyon ki osi dirizan SNP e tou lezot zofisye son Parti e zofisye lezot Parti dan lopozisyon ki’n fer tou sa ki zot ti kapab pour dekouraz sa Sheikh e pous li dan nou pei.
Source: The People
No comments:
Post a Comment